استعدى لرمضان (حلقة - 3 ) طريقة تجميد الخضروات

طبعا احنا فى الحلقة الأولى  عرفنا ازاى نجهز نفسنا وبيتنا واولادنا لاستقبال الشهر الكريم.

وفى الحلقة الثانية اتفقنا اننا بنجهز نفسنا لرمضان علشان يبقى عندنا وقت اكبر للعبادة.

الحلقة دى هاقولك على طريقة تجميد الخضروات بحيث وانتى بتشترى خضار  النهاردة هتزودى الكمية شوية وتعملى جزء للنهارده والباقى تجمديه لرمضان وتبقى وفرتى وقت الشراء وكمان وقت التحضير.

 

اولا : تجهزى اكياس بلاستيك المقاس اللى يناسبك والافضل تشترى من عند تاجر جملة وتجيبى مثلا نصف كيلو او ربع كيلو من مقاسين مختلفين او من السوبر ماركت ممكن تجيبى رول وانا بافضل مقاس 25*35.

ثانيا : الكيس لازم يكون سليم وفارغ من الهواء ...يعنى تفتحيه ساعة وضع الخضار فقط.

ثالثا :  لازم الخضار يصفى تماما من الماء قبل وضعه فى الكيس.

ودلوقت نبتدى بالبسلة:

نحضر اناء مناسب (حلة مثلا) ونضع فيها ماء ونضيف اليه معلقة كبيرة ملح ونرفعه على النار حتى الغليان.

وعلى ما المية تغلى نبدأ نفصص البسلة ونغسلها كويس ثم نضعها فى مصفاة.

ضعى البسلة فى الماء المغلى لمدة خمس دقائق ثم افرغى الاناء فى المصفاه واغسليها بماء بارد فورا.

بعد التأكد من خلو البسلة من الماء تماما نضعها فى كيس خالى من الهواء ونضعه فى الفريزر.

نفس الخطوات دى هنعمل بيها الفاصوليا الخضراء والبامية مع ملاحظة ان البامية لها معاملة خاصة بحيث يتم تنظيفها (تقميعها) من اعلى على شكل هرمى ولا تشق من المنتصف كما يضاف للماء المغلى نصف ليمونة.

ورق العنب :

حضرى الكمية المناسبة ويتم غسله جيدا ثم وضعه فى الماء المغلى لمدة ثلاث دقائق ثم يوضع فى المصفاه حتى تتأكدى من خلوه من الماء ثم يوضع فى فوطة جافة حتى نتأكد من تجفيفه تماما ثم يوضع فى كيس بلاستيك خالى من الهواء ثم يوضع فى الفريزر.

كل سنه وانتم طيبين والحلقة الجاية ان شاء الله هاقولك تعملى ايه بالبرطمانات اللى حوشناهم ....وياريت تسيبوا طلباتكم وتعليقاتكم هنا او على صفحة الفيس بوك علشان اقدر اتابعكم ....تحياتى  (ابلة شروق)